Hindi maaaring pigilan ng senado, ang pag-convene nito bilang impeachment court.
Ito ang iginiit ni dating Supreme Court Associate Justice Antonio Carpio, sa oras na maipadal na ang articles of impeachment laban kay Vice President Sara Duterte.
Ito ay kasunod ng pahayag ni Senador Robin Padilla na magsasagawa umano ang minority bloc ng pagtutol sa pag-convene ng impeachment court.
Ayon kay Carpio, malinaw umano sa Saligang Batas na kapag naisumite na ang articles of impeachment sa Senado, “trials shall proceed forthwith,” kaya’t hindi ito maaaring i-dismiss sa pamamagitan ng motion to dismiss.
Giit pa niya, mandato ng Konstitusyon ang pagsasagawa ng impeachment trial at hindi ito maaaring pigilan kahit pa may botong tumutol ang mayorya ng Senado.
Ipinaliwanag din ni Carpio na magtiwala siya na maaabot ng Kamara ang kinakailangang one-third vote upang maipadala ang articles of impeachment sa Senado.
Samantala, hindi rin sang-ayon ang dating mahistrado sa naging interpretasyon ng Korte Suprema sa salitang “forthwith” bilang “within a reasonable time.”
Ayon sa kanya, dapat itong unawain bilang agarang pagsasagawa ng paglilitis batay sa orihinal na intensyon ng Saligang Batas at ng mga bumuo nito. | via Judea Bernardo, D8TV News
