Ilang bagong pangalan at mga beteranong mambabatas ang posibleng bumuo sa prosecution team sa isinusulong na impeachment laban kay vice president Sara duterte.
Ito ang sinabi ni batangas 2nd district representative gerville luistro, kung saan kabilang daw sina Manila representative joel chua, san juan representative ysabel Maria zamora, bukidnon representative Keith Flores, at 1-Rider party-list representative ramon rodrigo Gutierrez.
Binanggit din ni luistro ang iba pang posibleng maging bahagi ng prosecution team tulad ng mga kilalang kritiko ng mga duterte, na sina Mamamayang Liberal party-list representative Leila de Lima, Akbayan party-list representative Chel Diokno, Bicol Saro party-list representative Terry Ridon, at Cagayan De Oro representative Lordan Suan.
Ayon pa kay luistro marami umanong abogado sa house committee on justice na may kakayahang humawak ng kaso.
“We have a lot of lawyers, maybe the question is their readiness and willingness to get back to this arena again” ani Luistro.
Gayunman, nilinaw ni Luistro na hindi awtomatiko ang kanyang pagsali sa prosecution panel kahit siya ang chairperson ng house committee on justice.
Mas nakatuon daw siya sa pagtatapos ng committee report na naglalaman ng articles of impeachment at sa pagdepensa nito sa plenaryo.
Aminado rin ang mambabatas na magiging mainit na debate sa kamara bago tuluyang mapagbotohan kung ipapasa sa senado ang articles of impeachment.
Kahapon, kinumpirma na nga ng house committee on justice, via unanimous decision, na nakitaan ng probable cause ang dalawang impeachment complaints laban kay duterte.
Dahil dito, nakatakda nang iprinesenta ng komite ang kanilang committee report sa plenaryo, ay talakayin kung dapat na ba itong iakyat sa senate trial court. | via Judea Bernardo, D8TV Correspondent
