Naglabas ng babala sa tsunami ang Japan Meteorological Agency para sa malawak na bahagi ng baybaying-dagat sa Pacific ngayong Miyerkules ng umaga, kasunod ng isang malakas na lindol sa silangang baybayin ng Kamchatka Peninsula sa Russia.
Ipinahayag ang babala bandang 9:40 a.m. (local time), na nagtaas mula sa dating abiso tungo sa isang ganap na alerto, kung saan inaasahang aabot hanggang 3 metro ang taas ng alon.
Sakop ng babalang ito ang mga baybaying rehiyon mula Hokkaido hanggang Wakayama Prefecture, kabilang ang mga lugar tulad ng Aomori, Iwate, Miyagi, Fukushima, Chiba, Ibaraki, Shizuoka, at bahagi ng Izu islands.
Mahigpit na pinapayuhan ang mga residente sa mga apektadong lugar na agad lumikas patungo sa mas matataas na lugar o pumunta sa itaas na palapag ng matitibay na gusali kung walang kalapit na mataas na lugar.
Binigyang-diin ng Meteorological Agency na maaaring lumampas sa inaasahan ang taas ng tsunami, rumagasa sa kalupaan, at dumating sa serye ng mga alon na paunti-unting lumalakas. | via Allan Ortega | Photo via Xinhua
#D8TVNews #D8TV
