Simula na ng bagong yugto para sa kapayapaan at pag-unlad sa Mindanao matapos ilunsad ng Office of the Presidential Adviser on Peace, Reconciliation and Unity (OPAPRU) ang profiling para sa humigit-kumulang 650 miyembro ng Moro National Liberation Front (MNLF) sa Sulu. Bahagi ito ng MNLF Transformation Program na layuning tulungan ang mga dating mandirigma na maging produktibo at mapayapa sa kanilang pagbabalik-loob sa lipunan.
Sa unang batch, 480 MNLF members ang sumailalim sa limang araw na socioeconomic profiling mula Hunyo 24 hanggang 28. Bawat isa ay makatatanggap ng ₱45,000 Transitional Cash Assistance na may kabuuang halagang ₱21.6 milyon. Isa itong konkretong hakbang upang masimulan ang pagbabagong buhay para sa kanila.
Bukod sa tulong pinansyal, naitala rin ng OPAPRU ang 537 armas mula sa mga bayan ng Patikul at Talipao sa Sulu mula Hunyo 18 hanggang 20. Ang dokumentasyon ng mga armas ay mahalagang hakbang upang mapabilang sila sa mga benepisyaryo ng programang ito.
Ayon kay OPAPRU Secretary Carlito Galvez Jr., ang programang ito ay hindi lamang tungkol sa tulong pinansyal kundi sa pangmatagalang kapayapaan at kaunlaran. Katuwang ang MNLF, layunin ng gobyerno na bigyang-daan ang pagbabago ng mga komunidad sa buong Bangsamoro at Mindanao. Tiniyak din niya ang patuloy na suporta ni Pangulong Ferdinand R. Marcos Jr. sa inisyatibong ito.
Upang mapalalim ang epekto ng programa, inilaan ang ₱122.1 milyon ngayong taon at ₱130 milyon para sa 2024 sa MNLF communities. Sa taong 2026, ₱373 milyon naman ang itatalaga para sa mga proyektong kalsada, kabuhayan, elektripikasyon, tubig, at pabahay sa ilalim ng PAMANA (Payapa at Masaganang Pamayanan) program.
Ang Transformation Program ay unang inilunsad sa Basilan noong Setyembre 2023, at Agosto 2024 ay pinlanong i-profile ang mahigit 2,000 MNLF combatants mula sa iba’t ibang lalawigan sa Bangsamoro. Sa patuloy nitong pagpapatupad sa Sulu, inaasahan ang tuloy-tuloy na pagsulong tungo sa kapayapaan at kaunlaran.
Lubos ang pasasalamat ng MNLF Lupah Sug State Committee sa OPAPRU at sa sektor ng seguridad. Ayon kay Mohammad John Usman, ang programa ay hindi lamang nagbibigay ng kabuhayan, kundi binubuhay din ang tiwala ng mga MNLF combatants sa gobyerno. Patunay ito na buhay pa rin ang diwa ng 1996 Final Peace Agreement.
May apat na pangunahing sangkap ang Transformation Program: seguridad, sosyo-ekonomiya, pagtitibay ng tiwala, at komunidad na pagpapagaling at pagkakaisa. Sa ilalim ng socio-economic component, makakatanggap ang mga MNLF combatants ng cash aid, bigas, health insurance, at tulong sa pagpaparehistro, mga hakbang tungo sa isang panibagong simulang may dignidad at direksyon. | via Ghazi Sarip | Photo via PNA
#D8TVNews #D8TV
