Sumuko sa Philippine National Police–Criminal Investigation and Detection Group o PNP-CIDG si dating senador Ramon “Bong” Revilla Jr. kagabi ng Lunes, matapos maglabas ng arrest warrant ang Sandiganbayan Third Division kaugnay ng umano’y P92.8 million ghost flood control project sa Pandi, Bulacan.
Dumating si Revilla sa Camp Crame sa Quezon City bandang alas-10 ng gabi.
Mas maaga nitong Lunes, nagpalabas ang anti-graft court ng warrant of arrest at hold departure order laban kay Revilla at ilang dating opisyal ng Department of Public Works and Highways kaugnay ng kasong malversation.
Bukod kay Revilla, kabilang sa mga respondent sa kaso sina dating DPWH Bulacan First District Engineering Office assistant district engineer Brice Hernandez, dating Engr. Jaypee Mendoza, Engr. Arjay Domasig, Engr. Emelita Juat, dating finance section chief Juanito Mendoza, at cashier na si Christina Pineda.
Samantala, kinagabihan din ng Lunes ay nagsilbi ang National Bureau of Investigation ng arrest warrant laban kina Hernandez at Mendoza sa loob ng Senado. | via Judea Bernardo
