Sinampahan ng reklamong graft at malversation sa Sandiganbayan ang dating senador na si Bong Revilla at anim pang opisyal ng Department of Public Works and Highways (DPWH).
Nag-ugat ang pagsasampa ng kaso ng Ombudsman dahil sa umano’y natuklasang P92.8 milyong halaga ng ghost flood control project sa Pandi, Bulacan na nai-award noong March 28, 2025.
Bukod kay Revilla, nahaharap din sa kaso ang ilang opisyal ng DPWH tulad nina dating DPWH assistant district engineer Brice Hernandez, dating DPWH engineer Jaypee Mendoza, Engineer Arjay Domasig, Engineer Emelita Juat, Juanito Mendoza at Christina Pineda.
Ayon kay Assistant Ombudsman Mico Clavano, nakitaan ng probable cause para sampahan ng kasong kriminal ang mga ito matapos ideklarang kumpleto ang proyektong hindi naman naipatupad.
“To facilitate the release of the entire project cost, the respondents are found to have falsified accomplishment reports, issued fraudulent billing documents, and endorsed disbursement vouchers,” ayon kay Clavano.
Nitong Huwebes, January 15, sinabi ng Department of Justice na isa si Revilla sa nahaharap sa kasong plunder na may kaugnayan din sa flood control project scandal. | via Alegria Galimba
