Pinagtibay na ng Commission on Elections (Comelec) ang desisyon nitong pahintulutan ang proklamasyon ni dating Marikina City Mayor Marcelino “Marcy” Teodoro bilang nanalong kinatawan ng 1st District ng lungsod, matapos ilabas ng Comelec and Certificate of Finality at Entry of Judgment kaugnay ng kanyang kandidatura sa 2025 elections.
Sa nasabing certificate, nakasaad na ang resolusyong ipinasa noong June 25 ay “immediately executory” sa ilalim ng Comelec Rules of Procedure, matapos ang limang araw mula nang matanggap ito ng mga kaugnay na panig, at dahil na rin sa kawalan ng Temporary Restraining Order (TRO) mula sa Korte Suprema.
“No restraining order has been issued by the Supreme Court within five days from receipt of the parties of the resolution that would preclude the 25 June 2025 Resolution of this Commission (En Banc) from being final and executory,” ayon sa Comelec.
Bunga nito, tuluyang ibinasura ng en banc ang desisyon ng Comelec First Division noong Disyembre 11, 2024, na nagkansela sa Certificate of Candidacy (CoC) ni Teodoro.
Tinanggap ng en banc ang consolidated motions for reconsideration na inihain ni Teodoro laban sa petisyong inihain nina dating Senador Koko Pimentel at tatlong iba pa.
Ayon sa Comelec, ang City Board of Canvassers (CBOC) ng Marikina City ang magsasagawa ng pormal na proklamasyon, alinsunod sa utos ng poll body.
Matatandaang si Teodoro ay nanalo sa nakaraang eleksyon matapos makakuha ng 75,062 boto laban kay Pimentel. | via Clarence Concepcion | Photo via PNA
#D8TVNews #D8TV
