Nagsumite ng referral ang Independent Commission for Infrastructure (ICI) at Department of Public Works and Highways (DPWH) sa Ombudsman laban sa mga “cong-tractors” ngayong araw.
Ito ay bilang rekomendasyon sa pagsasampa ng kaso laban sa ilang miyembro ng Kamara matapos nilang makakuha o ng kanilang pamilya ng aabot sa 1,300 infrastructure projects sa pamahalaan mula 2016 hanggang 2024.
Kabilang dito sina:
• dating Ako Bicol Party-list Rep. Zaldy Co
• CWS Party-list Rep. Edwin Gardiola
• Uswag Ilonggo Party-list Rep. James Ang Jr.
• Pusong Pinoy Party-list Rep. Jernie Nisay
• Bulacan 2nd District Rep. Augustina Pancho
• Cagayan 3rd District Rep. Joseph Lara
• Surigao del Norte 1st District Rep. Francisco Matugas
• Tarlac 3rd District Rep. Noel Rivera
Ayon kay DPWH Secretary Vince Dizon, posibleng masampahan ng plunder, anti-graft, direct bribery at government procurement act ang mga nasabing indibidwal.
Dagdag pa niya, umpisa pa lang ito at may iba pa silang tinitingnan.
Samantala, binanggit ni Ombudsman Jesus Crispin Remulla na humiling siya sa Bureau of Immigration ng foreign travel restriction order laban sa 77 indibidwal na nasa ilalim ng imbestigasyon kaugnay sa maanomalyang flood control projects.
Ayon kay Remulla, pigilan silang makaalis ng bansa habang sumasailalim sila sa imbestigasyon. | via Alegria Galimba
