Sinabi ng Department of Agriculture (DA) nitong Miyerkules na walang planong mag-angkat ng asukal hanggang sa katapusan ng unang kalahati ng 2026 upang maprotektahan ang lokal na industriya ng asukal.
Ayon sa DA, sina Agriculture Secretary Francisco Tiu Laurel Jr., SRA Administrator Paul Azcona, at SRA Board Member Dave Sanson ay nagpulong upang tugunan ang pagbaba ng presyo ng asukal na nakita sa unang sugar bidding sa Negros noong Oktubre 9.
Ipinaliwanag ng ahensya na may pangamba sa merkado dahil sa mga spekulasyong may paparating na importasyon. Dahil dito, tiniyak ng mga opisyal na walang importasyon na magaganap hanggang matapos ang kasalukuyang milling season sa Mayo o Hunyo 2026.
Dagdag pa ni Tiu Laurel, “Walang usapan tungkol sa importasyon hanggang matapos ang milling at may malinaw na datos ng produksyon.”
Napagkasunduan rin na magpanatili ng dalawang buwang buffer stock ng refined sugar para sa katatagan ng merkado.
Ayon kay Sanson, ito ay patunay na inuuna ng administrasyon ang kapakanan ng mga magsasaka at inaasahang makakatulong ito sa pagpapatatag ng presyo.
Simula 2022, lumawak na ang taniman ng tubo mula 380,000 ektarya tungo sa 409,000 ektarya ngayong taon. Nanatiling matatag din ang farmgate at retail prices kapwa pabor sa mga magsasaka at mamimili. | via Allan Ortega
