Hinimok ng Police Regional Office (PRO)-6 ang mamamayan ng Western Visayas na ireport agad ang mga police station na hindi kaagad tumutugon sa mga nangangailangan ng responde. Ito’y alinsunod sa bagong patakaran ng Philippine National Police (PNP) na nagsusulong ng “5-Minute Response Time” sa bawat emergency.
Ayon kay Police Lt. Col. Arnel Solis, tagapagsalita ng PRO-6, ang panuntunang ito ay tuwirang utos mula kay PNP Chief Gen. Nicolas Torre III. Layunin nitong masigurong mabilis at epektibo ang pagtugon ng mga pulis sa mga insidente, lalo na sa mga oras ng krimen o sakuna. Ipinunto ni Solis na hindi na maaring palampasin ang pagkaantala ng serbisyo mula sa hanay ng kapulisan.
Bilang tugon sa bagong direktiba, isinagawa ni Gen. Torre ang kanyang unang command conference sa PRO-6 headquarters nitong Hunyo 14. Dumalo rito ang mga hepe ng pulisya mula sa Western Visayas, Central Visayas, at Negros Island Region upang talakayin ang implementasyon ng patakaran.
Sa pagpupulong, inatasan ni Gen. Torre ang mga police commanders sa buong bansa na tukuyin ang mga lugar na dapat unahing pagtuunan ng pansin para maisakatuparan ang 5-minute response time. Kabilang sa mga ito ay ang matataong lugar, high-crime areas, at mga kritikal na komunidad.
Ipinahayag din ng PNP chief ang kahalagahan ng pag-unawa ng pulisya sa tunay na pangangailangan ng bawat lugar—magkakaiba man ito sa urban at rural na komunidad. Aniya, hindi sapat ang basta may presensya ng pulis, kundi kailangang angkop ang tugon sa uri ng insidente at pangyayari.
Kasama rin sa mga napag-usapan ang tamang pagtalaga ng mga pulis sa kani-kanilang istasyon upang mapabilis ang operasyon. Isa sa mga hakbang ay ang posibleng deactivation ng ilang police community precincts na hindi epektibo o wala sa strategic location.
Sa kabuuan, malinaw na layunin ng bagong polisiya na ibalik ang tiwala ng publiko sa kapulisan—na ang kanilang panawagan ay agad na mapakikinggan at matutugunan. Sa tulong ng kooperasyon ng mamamayan at seryosong reporma sa hanay ng pulisya, maaring makamit ang mas ligtas at mas episyenteng serbisyo sa buong bansa. | via Ghazi Sarip | Photo via PNA
#D8TVNews #D8TV
