Cotabato City – Nilusob ng Philippine Drug Enforcement Agency (PDEA) Sulu ang isang drug den sa Barangay Kagay, Indanan, Sulu noong Pebrero 17, 2025, kung saan naaresto ang nagpapatakbo nito at sampung iba pa sa isang buy-bust operation.
Kinilala ang tagapamahala ng drug den bilang si Alyas Alin, 45 anyos, kasama ang kanyang mga parokyanong sina Alyas Son, Alyas Ben, Alyas Alex, Alyas Sam, Alyas Al, Alyas Moh, Alyas Fai, Alyas Dar, Alyas Al, at Alyas Lyka.
Nakumpiska sa operasyon ang apat na sachet ng shabu na may timbang na 10 gramo at tinatayang halagang ₱68,000, tatlong sachet ng pinatuyong dahon ng marijuana na may bigat na 5 gramo, iba’t ibang drug paraphernalia, buy-bust money, at isang mobile phone.
Hawak ngayon ng Indanan Municipal Police Station ang mga suspek at sasampahan ng kasong paglabag sa Republic Act No. 9165, o ang Comprehensive Dangerous Drugs Act of 2002.
Patuloy ang pinaigting na kampanya ng mga awtoridad laban sa ilegal na droga sa rehiyon. – via Benjie Dorango / Photos: PDEA
