Matapos ang tatlong taon mula sa kanilang “Huling El Bimbo” reunion concert noong 2022, muling binuksan ng Eraserheads ang kanilang kwento sa dokumentaryong “Eraserheads: Combo on the Run.” Itinatampok sa pelikulang ito ang paglalakbay nina Ely Buendia, Raymund Marasigan, Buddy Zabala, at Marcus Adoro—mula sa kanilang pagsisimula sa UP Diliman, pag-angat sa kasikatan, paghina ng kanilang samahan, hanggang sa kanilang mga karera at ang healing process ng banda.
Ayon kay direktor Diane Ventura, biglaang nagdesisyon ang banda na gumawa ng isang dokumentaryo habang naghahanda sa kanilang concert noong 2022. Layunin ng dokyumentaryo na bigyang-linaw ang kanilang kwento at ipakita ang kahalagahan ng komunikasyon at pag-unawa sa isa’t isa.
Ibinahagi ni Buendia na ang pagkatuto nilang makinig at makipag-usap, gaano man kahirap, ay naging susi sa kanilang healing process bilang banda. Sa pamamagitan ng dokumentaryo, nagkaroon sila ng pagkakataong pag-usapan at ayusin ang kanilang mga hindi pagkakaunawaan, na nagbigay-daan sa mas bukas na samahan.
Ang “Eraserheads: Combo on the Run” ay kasalukuyang ipinapalabas sa mga piling sinehan, at inaasahang magbibigay-inspirasyon sa mga tagahanga at manonood sa pamamagitan ng tapat na paglalahad ng kwento ng banda. | via Dann Miranda | Photo via The Ely Buendia FB Page
#D8TVNews #D8TV
